自領展從香港房屋委員會接手屋邨零售及停車場業務後，不論市民、民間團體或政黨都對領展嘅投訴未曾間斷，近年不滿嘅聲音更有愈演愈烈之勢，令領展成為政黨攻擊政府嘅彈藥。領展嘅出現，歸根究柢係之前兩屆政府種下嘅禍根，成功上市後自然不受約束和限制，可惜現屆無神經政府一直無知無覺、不聞不問。到近期民怨日深之時，特首梁振英才高調向領展發炮，但為時已晚，俗語講句「領展睬你都傻」！
首任特首董建華當年提出八萬五房屋政策，而前特首曾蔭權爵士及後又停建及停售居屋，令房委會財政入不敷支，房委會遂於○四年決定分拆公屋商場及停車場予領匯（領展前身），之後仲上市。私有化帶嚟嘅就係唯利是圖，領展多年來被指不斷加租、翻新商場，小租戶苦不堪言，如果捱唔住，就被有財力嘅大型連鎖集團進駐，所謂羊毛出在羊身上，最後捱貴物價的自然係小市民，可惜政府束手無策，惟有視而不見。
近年針對領展嘅請願、抗議已進化到近來嘅汽車慢駛遊行、甚至佔領領展總部。領展問題關乎民生，特別係基層市民，各大政黨如獲至寶，提供咗源源不絕嘅政治彈藥，泛民主派全力追殺，建制派亦都唔執輸，狠批領展之餘，亦反映政府無能管治。面對社會不滿聲音日增，最近梁振英不得不高調向領展發炮，指領展並非發展商，係有獨特企業社會責任，唔應該以追求最大利潤為目標，而係要服務公屋居民，又質疑領展高層花紅同加租幅度掛鈎，會產生社會影響。
須知領展已經係一間上市公司，對於政府炮轟，只係輕輕拋低一句「歡迎政府回購」。領展市價已今非昔比，回購又談何容易？呢個已經係禮貌嘅回應，難聽啲可以批評政府干預商業市場。政府對於領展問題一直視若無睹、無知無覺，依家想收拾爛攤子，可以話為時已晚，相信唯一解決辦法就係喺屋邨鄰近興建市政大樓及多層停車場，以紓緩小市民怒氣。