政情：台港合作不變 吳永嘉：組團出訪
中華廠商聯合會副會長吳永嘉（Jimmy）尋日首次以香港──台灣商貿合作委員會主席身份出席台灣駐港機構舉辦嘅活動，外界都關注台灣新政府上台後，會否令雙方交流受到影響。Jimmy就話，兩地貿易交流冇受到政治影響，溝通機制亦無大改變，佢仲打算下半年組團到台灣訪問添！
Jimmy仲話，港台之間有龐大商機，事關台灣係香港第二大入口來源地，亦係香港第四大出口市場。佢盛讚台灣食品價廉物美，所以經常去台灣搵食。
尋日活動係台北貿易中心舉行嘅台灣夏季水果推介會，Jimmy話最鍾意食芭樂，因為唔會太甜又夠晒健康，巨峰葡萄都好好食，但佢對葡萄皮敏感，所以無福消受。台北貿易中心主任孫至誠就話，今次推廣獲台灣政府資助運費將當造生果空運到港，喜愛台灣水果嘅唔好執輸喇！