政情：撞傷肋骨 鄭承峰缺席活動
尋日一班仁濟醫院董事局成員齊齊去到荃灣一個屋邨出席活動，見幾位副主席同一班總理都喺度，但偏偏唔見咗主席鄭承峰，原定會致詞嘅部分亦由副主席嚴徐玉珊代替，唔知發生咗咩事呢？我哋問過仁濟，佢哋話因為鄭承峰較早前遇到交通意外，撞傷肋骨，搞到依家要養傷唔可以四圍走動，唔怪得要缺席嘞！
負責籌備活動嘅同事透露，大約一個星期之前，有日鄭承峰於街上正準備上車之際，其尾隨車輛懷疑收掣不及，撞向鄭承峰上緊嗰部車嘅車尾，當其時上緊車嘅鄭承峰亦因此撞咗埋去車門度，令肋骨受傷，真係諗起都痛。所以剛過去一個星期內嘅其他活動，佢都出席唔到，但好在仁濟成班董事局成員個個都上下一心，義不容辭幫手，令一連串活動可以順利如期舉行。