政情：授勳唔理好醜 黑豬照印白兔仔

話說喺五月底，一個Facebook專頁爆料指有「保皇黨前任大佬」喺九龍中最大型醫院用特權做手術，包括「打尖」排頭位做手術以及同太太着住便服喺手術室無菌範圍四處走動等，令一眾醫生及護士敢怒不敢言，最後被揭發呢位「前大佬」就係譚耀宗。起初譚耀宗辯稱做手術係由醫院安排，但之後事件愈搞愈大，最後佢要鞠躬道歉。先係想瞞天過海，東窗事發後就想推卸責任，值得獲頒大紫荊勳章咩？

失職官員獲頒星章 理據難明

而獲頒金紫荊星章的名單當中，竟然包括鄧國威，若果覺得佢對政府有大貢獻兼有用嘅話，點解會「被炒魷」呢？點解炒完佢，又頒個星章畀佢呢？鄧國威一直被指無能力駕馭公務員，未能配合政府施政，因而「被炒魷」換人，如今向佢頒發星章，兼且一併獲委任為太平紳士，究竟係當安慰獎吖？抑或係逢高官卸任都有章頒呢？

無神經政府亂授勳，將「黑豬」當白兔又豈止譚耀宗同鄧國威，好似發展局局長陳茂波（波叔）惹起嘅風波一浪接一浪，除先後被嘲為「劏房波」及「囤地波」之外，喺鉛水風波中，更被狠批包括他轄下嘅水務署在內多個部門集體失職，但佢只係道歉冇被罰，再加上最近爆出勞工處前助理處長麥世耀與富豪霸佔石澳東丫背村官地及非法改建寮屋豪宅醜聞，波叔轄下嘅地政總署承認收到投訴後懶懶閒，被立法會議員炮轟失職。劣績斑斑，竟然獲頒金紫荊星章，試問有何理據？

至於環境局局長黃錦星（星星）都係做邊瓣衰邊瓣，竟然都獲頒金紫荊星章。佢指要搞源頭減廢，但三堆一爐搞到一鑊粥，為配合日後推出嘅家居固體廢物徵費，食物及衞生局最近推出「細口仔垃圾桶」，結果被人鬧爆搞到周街垃圾兼加重清潔工作量，本末倒置。由此可見，頒授勳章根本無準則可言。

多名富二代被委任太平紳士

此外喺太平紳士嘅委任名單中，有唔少係富二代，包括新世界發展及新創建董事會主席鄭家純嘅兒子鄭志剛、遠東發展集團主席邱達昌嘅女兒邱詠筠、全國人大常委范徐麗泰嘅兒子范駿華、行政會議及立法會議員林健鋒的兒子林凱章、港協暨奧委會會長霍震霆嘅兒子霍啓剛、羅氏針織創辦人羅定邦嘅孫女羅可欣、全國政協常委及九龍倉集團首席顧問吳光正嘅兒子吳宗權、全國政協委員及香港榮利集團董事會主席盧文端嘅兒子盧金榮、合和實業主席胡應湘嘅兒子胡文新、著名建築師呂元祥嘅兒子呂慶耀；仲有前全國政協常委、香江國際集團董事長楊孫西嘅兒子楊華勇，以及立法會議員梁君彥嘅兒子梁宏正等，各行各業都有份，呢個安排莫非同下年特首選舉有關？