近年有唔少政黨都以電話短訊、網上發貼形式招募義工，但依家咁多街站，義工搞錯就惹來笑話。香港眾志成員林淳軒尋日喺Facebook透露，話有一位工聯會女義工「擺烏龍」，幫佢哋嘅街站派傳單。女義工仲要派咗十五分鐘傳單先發現自己搞錯，即刻用唔鹹唔淡嘅廣東話講：「唔巧意思，禾九菜咗（唔好意思，我搞錯咗）」，拿拿臨還番疊傳單，再去工聯會幫手。
林淳軒事後仲語帶嘲諷話：「對唔住，做我哋義工係無錢的……你派咗嗰十五分鐘，我都回唔到水畀你……」佢仲幫女義工改名叫「阿萍」，話係因為萍水相逢嘅關係喎。其實香港眾志都唔好笑人，因為難保自己嘅義工都唔出錯，而其他政黨亦應該吸取教訓，提供多啲資料畀義工，避免再發生「變節」喇。
話口未完，香港眾志笑完人哋，自己就「甩轆」被網民嘲笑。副主席黎汶洛將饒宗頤文化館的「銀杏館」寫成「銀杏樓」，又「夾硬」擴張句子，搞到文句唔通順，結果被網民用紅筆改正之餘，仲笑佢「估唔到你英文差，中文都一樣咁廢。」至於有私補開英文嘅副秘書長周庭，亦被人發現佢張卡片連Secretary（秘書）都串錯字，但周庭就話卡片已改正喇。
卓妮