中環出更：卿姐退火線 坦言25年來無朋友
民主黨主席、立法會議員劉慧卿年初宣布退下火線，今年任期屆滿之後，將結束廿五年的議員生涯。有人以為卿姐過去廿五年必定廣交良朋，但事實剛剛相反。卿姐接受專訪時坦言，多年來日夜都在立法會工作，無時間交朋友，但不論感情或友情，她都認為孤身一人無問題。外人眼中或許感覺她有點淒慘，但佢完全唔介意。
民主路上嘅同路人多，但交心嘅人少。卿姐話，多年來無特別欣賞嘅官員，亦冇特別交心嘅政界朋友。佢反問，日夜都在立會工作，點有時間交朋友呢？雖然辦公室入面放咗佢同陸恭蕙、黃錢其濂等人早年在倫敦嘅合照，又有佢同其他議員嘅相片，但佢直言同相中人已經多年無聯絡了。
友情之外，埋首政治亦是卿姐婚姻觸礁其中一個原因，離婚後佢一直獨居在跑馬地。卿姐形容，現時感情生活幾好，就係自己同自己，完全無問題，做起事上來非常起勁。
未諗去向 盼新一代盡力
既然咁有幹勁，點解又言退？卿姐否認社會新舊交替趨勢係自己退下火線嘅原因，反而係因為自己覺得做夠了，要退落嚟。佢話，有唔少市民挽留佢，但佢唔會因為其他人改變決定，「（有人支持點解唔做？）你咁諗係好傻，係自己決定，唔係人哋決定。」問到告別議會之後嘅去向，佢話仲未諗，又話唔擔心會悶，因為「全香港好多人都唔係議員啦，佢哋都唔會悶啦！」
廿五年議員生涯，卿姐話唯一遺憾嘅係唔能夠為港人爭取普選，就連當年動議「九五直選」失敗，唔可以一人一票選立法局，佢都認為無大不了。「當時有人喊，但我又無嘢，保皇黨唔支持，過唔到就過唔到。」都未成功爭取，何解唔做落去呢？卿姐話，永遠都做唔夠，但以後有人會做。
至於民主棒能否可以成功交接，佢話要睇選民決定，唔係話佢讓位，就有其他民主黨員可以當選。不過，卿姐囑咐新一代，如果當選立法會議員就要盡力去做，班乳鴿同中鴿好好記住喇。
卓妮