政情：眾志又搬龍門 公投如玩泥沙
由前學民思潮核心組成嘅香港眾志（眾志），強調要推行公投自決香港未來嘅理念，並訂出十年嘅路線圖，但又不停修訂時間表，最新係推前至下年特首選舉發動民間公投。唔知係咪因早前被法院駁回降低立法會參選年齡嘅司法覆核，秘書長黃之鋒參選無望，若再用十年時間推行自決公投，屆時佢嘅政治光環消失殆盡，先急住「搬龍門」？
眾志主席羅冠聰同黃之鋒尋日喺一個午餐會演講，黃之鋒話經過前年嘅佔領行動後，甚至今年農曆年初一晚旺角暴亂後，都未能爭取普選特首，無論係和平甚至暴力抗爭手法都冇用，羅冠聰更形容現時處於樽頸位，由於政治光譜太闊，必須爭取更多市民支持，採取溫和嘅爭取方式。咁咪即係走回頭路，甚至係走溫和泛民嘅舊路囉！
時間表隨口噏 一時一樣
對於推行公投自決嘅時間表，羅冠聰話回歸後五十年不變，即係直至二○四七年，但一九八四年已商討香港前途問題，應以此年計後五十年，所以應喺二○三○年自決公投。
眾志話用十年時間推動公投自決，理應到二六年達到目的，但羅冠聰所指嘅係三○年，似乎延遲咗，但佢哋尋日又喺報章撰文，指將推動喺明年特首選舉發動民間公投。時間表一時一樣，好似隨口噏咁，唔通佢哋當公投自決係小朋友玩泥沙？