即將離開立法會嘅公民黨黨魁梁家傑，臨別秋波於網媒撰文，自爆喺九七回歸後曾有兩次機會走上建制之路，其中一次距今十二年，佢喺二○○四年當選立法會議員後無幾耐，曾拒絕時任特首董建華邀請任行政會議非官守成員，他自稱，假如當年答應邀請加入，行會會增添失信於選民嘅一員，又形容猶如「廢人一個，只會害了政府」。
梁家傑又稱另一次機會係一九九八年，自己獲邀加入律政司任法律政策專員，但係由於唔知加入政府會唔會令自己無法堅持原則，加上當時啱啱成為資深大律師，對私人執業充滿憧憬，因此拒絕咗邀請。
仲記得曾任大律師公會主席嘅梁家傑，於前年違法佔領行動清場時留守一度被捕，好在佢當年冇應承加入律政司，事關或令律政部門「立立亂」；再退一步嚟講，好彩佢冇加入行會，否則親建制派人士觀乎佢近年嘅言行，實會批評當年政府係咪「有眼無珠」。