政情：葉劉憶初入官場被省到喊
行政會議兼立法會議員葉劉淑儀曾喺政府工作近卅年，離開政府前最後一個職位係保安局局長，原來佢初入官場就曾考慮辭職，仲畀上司省到喊咁滯添！
做三個月嗌辭職
葉劉尋日接受電台節目訪問時自爆，喺一九七五年加入政府時負責紀律事宜，入職兩、三個月已需負責簽署具有法律效力嘅文件，但係當時冇人教佢，好快就覺得好辛苦，又多嘢做，有時做錯事仲會被上司責罵，佢覺得好難受，因此工作至三個月時已支持唔住，遂向當時嘅上司、時任財政司麥高樂請辭，但係對方收信後好不滿。葉劉直言，雖然獲麥高樂挽留，但認為佢唔係純粹想培育自己，而係唔想因佢嘅辭職而受影響，因為「留番我喺度，但個Report寫得好衰，『省』到喊咁滯」。
回顧呢段經歷，葉劉坦言反映佢當時太不懂人情世故，已深刻檢討，又自言喺政府工作廿九年，總有上司喜歡同唔喜歡佢嘅工作表現。被問到邊方面嘅性格令上司討厭，係咪因「叻過頭」？葉劉冇正面回應，淨係話：「我唔想咁講，我無資格咁講」。