政情：漢奸黎縮頭龜 避霸王匿一世?

累生意蝕六億 裁減逾萬員工

身為上市公司主席嘅陳啟源前日不惜扮演「街頭鬥士」，聯同十幾個員工帶埋寫上「打倒漢奸黎智英，討回公道還清白」嘅橫額，先後踩到將軍澳壹傳媒大樓同漢奸黎喺何文田嘅住所外示威，不滿《壹週刊》誹謗佢公司，搞到佢盤生意唔見咗六個億。佢尋日解畫，話好多員工因唔滿意法院判賠償太少，喺呢個月十五、十六號自發到壹傳媒大樓同漢奸黎住所外抗議，又要求佢企出嚟，所以佢前日就聲援員工，同佢哋「同聲同氣，共命運」！

陳啟源仲話係諗住去搵漢奸黎直接對話，討論乜嘢叫「新聞自由」。因為佢發現《壹週刊》專門攻擊華人企業，用新聞自由作幌子，做盡損害民族利益同感情嘅事，以佢為例，《壹週刊》對霸王嘅誹謗報道，就搞到佢嘅生意一落千丈，要裁員改革，萬幾個員工飯碗不保。

搵到佢出嚟對質 隨時奉陪

但連番示威亦唔見漢奸黎現身，問佢覺唔覺得漢奸黎似縮頭烏龜？佢話「有啲似。可能佢怕我會衝動啦，但我係尊重新聞自由嘅，就唔係話用新聞自由就可以無故傷害企業。」再追問日後會唔會繼續搵漢奸黎「挑機」？佢就話如果能夠搵到佢出嚟，隨時願意奉陪，又話覺得示威係體現香港民主法治社會嘅典範，係直接、簡單同慳錢嘅方法表達訴求同不滿。

佢又解釋上個星期點解突然取消上訴，話上個月尾高等法院雖然判霸王勝訴，但只係罰《壹週刊》三百萬元同畀八成訟費，對判決感到極度不滿，話法院用幾十年前嘅法例去衡量瞬息萬變嘅互聯網年代係對霸王唔公平，所以就喺上星期一提出上訴。佢同律師傾過，上訴大概要三百萬元，錢銀事小，但時間同精力事大，寧願將啲時間花喺重建品牌，所以就取消上訴，未來會做嬰兒產品同拓展電子平台，希望霸王盡快重生。