中環出更：英獨聯東亞開戶 禁收捐款
前「香港人優先」成員招顯聰前日下晝開記招宣布成立「香港歸英獨立聯盟」（英獨聯），但相隔唔夠一日就連番甩轆。首先係招顯聰之前以建築公司「巷蜀公司」之名，喺東亞銀行開咗個戶口收取捐款，但有網民尋日存款被拒，隨即惹起東亞銀行對戶口進行政治審查嘅質疑，但招向銀行質詢後，銀行回應指存款往新戶口，必須要出示有關生意往來證明。可見，偷龍轉鳳開戶收捐款，此路不通。
話說尋日朝早有網民通知招顯聰，指佢提供嘅捐款戶口未能存款，招得悉後隨即質詢東亞銀行，銀行回覆指存款往新戶口，需出示有關生意往來的證明。老實講，嗰間公司根本冇生意往來，點樣提供相關證明，只係用嚟作收取捐款之用。而喺銀行回覆後，招更對此感到萬分抱歉。
成立僅一日 招顯聰「閃分」
上晝發生戶口捐款甩轆後，下晝就爆出「閃分」。招顯聰發聲明，指自己同英獨聯對獨立看法有分歧，英獨聯又唔想同台獨扯上關係，所以「即日與其和平分手」。其實前日英獨聯成立時，招顯聰冇講明黨內仲有乜嘢成員，開記招時亦曾與黨友嗌交，仲爆粗添！如今「閃分」，過程之快及戲劇化，相信編劇都寫唔到。
卓妮