美國佬最愛講「民主」、「民權」同「民享」等「普世價值」，但老朽常為「美式民主」笑到見牙唔見眼，也顧不得十年未洗過棚煙屎牙。這明顯違反聖賢教訓「君子不重則不威」。寵辱不驚，不苟言笑，做人未免太辛苦也太假了！
柏楊說：中國人之所以笑臉少，可能是百年來戰亂頻仍，哭的時候多，依生物學「用進廢退」的定律，以致想笑都笑不出。老朽就係怕「用進廢退」，好似冇神經政府咁，凡事唔被媒體踢爆都唔做嘢，苟且偷安，凡事不了了之，講咗當做咗，由是搞到香港一鑊泡。
言歸正傳，講番美國佬啲好笑嘢。美國《時代》雜誌早前有個封面故事，話繼美國最高法院裁定同性婚姻合法化，社會問題的新戰場，已轉向變性人到底該上哪種洗手間——男廁或女廁？奧巴馬叻唔切，忙不迭下權威式批示：敦促所有學校允許變性學生按照自己的性別認知來選擇洗手間。
原本奧巴馬亦不過隨口噏當秘笈，其指令不具法律約束力，奈何司法部和教育部跟車太貼，發信警告那些接受聯邦資金支持的公立學校、大學和學院，若然限制學生只能根據出生證上的性別選擇洗手間或更衣室的話，它們很有可能會失去聯邦的教育資金支持。
變性人可根據意願去男廁或女廁，表面好「美式民主」，然而，社會上並不以為然，以德州為首的十多個州已提出訴狀，指控奧巴馬政府無視兒童安全，要求法官宣布此前政府頒布嘅「變性學生如廁指導」為非法。奧巴馬任期仲有幾個月，還要整篤蘇州屎自己歎，你話不好笑嗎？美國的確係個包容唔同種族嘅國家，亦尊重各方人嘅人權；但變性人如廁問題，牽涉到婦女、兒童的人身安全，本來根據其出生證上的性別選擇就天下太平，可政府就係要「民主」，終於又搞出個大頭佛！哈哈哈！