政情：陳維安話議事規則需改進
立法會近年面對激進議員拉布、流會、掟嘢，對於立法會秘書處及各黨派議員嘅挑戰愈來愈大，接任立法會秘書長近四年嘅陳維安（Kenneth）尋日出席活動時話，依家每朝起身仲係有返工衝勁及挑戰，呢份工係佢單一職位做得最長嗰份，又話面對拉布，現時議事規則發展仲有好多地方需改進，莫非佢已有腹稿，計劃趁下月抖暑時坐言起行就此進行研究？
曹星如冀打贏日本拳王
Kenneth尋日出席活動，與青年人分享夢想，同場仲有被視為拳壇「神奇小子」曹星如，佢憶述自己初出道頭一年半時，拳擊比賽收入唔多，真係搵唔到食，曾經諗過放棄，不過每次勝出比賽嗰種喜悅，係冇嘢可以替代。曹又透露，下一目標係挑戰日本拳王，希望從對方身上奪得世界冠軍稱號，不過首先自己要贏多幾場比賽，提升排名先可以有主導權。