政情：教聯教協巨頭 齊插吳克儉
被嘲為「吳得掂」嘅教育局局長吳克儉上任以來風波不斷，不論近來強推嘅一帶一路獎學金，定係剛過去嘅小三全港性系統評估（TSA）風波都搞到一鑊粥。教育界兩大巨頭教聯會同教協尋日分別召開記者會，異口同聲狂插吳得掂，教聯會副主席蔡若蓮暗寸吳得掂平時只係「讀書」，處理教育政策時「堅離地」；而立法會教育界議員、教協嘅葉建源公布調查結果，受訪身兼教協會員嘅教師同公眾對吳得掂嘅表現平均畀三至四分，唔單止唔合格，仲有百分之二十嘅受訪者請佢食零雞蛋添！佢真係名副其實吳得掂。
斥尸位素餐 只顧「讀書」
自稱唔係以教聯會身份開記者會嘅教聯副主席蔡若蓮，尋日開咗個盛大嘅記者會，公布個人未來動向。佢話已經忍無可忍，大鬧教育最高決策者吳得掂尸位素餐，對幼師待遇漠不關心、對人口衝擊視若無睹、對人手編制漠不關心、令合約教師壯志消磨，唔單止批評吳得掂只顧「讀書」、「堅離地」，又反問佢上任以來係懵然不知，定係無能為力。咁吳得掂係唔係要下台？佢就覺得局長一日有出糧就要做嘢，否則唔應該做局長。
資源分配不公惹眾怒
另一邊廂，葉建源就公布早前委託港大做嘅調查，調查訪問咗公眾同教師各一千人，結果顯示，以十分為滿分，公眾對吳得掂嘅表現滿意度平均只係得四分，而教師對佢嘅滿意度更平均得三分，喺處理教育政策方面，百分之十九嘅受訪公眾同百分之十七點二嘅受訪教師畀佢零分，當中以中學同大學教師對吳得掂最為不滿。葉建源就分析，公眾係因為對教育資源分配不公非常不滿，所以先畀咁低分。
咪以為有吳得掂呢個共同敵人，教聯會同教協就可以做朋友，蔡若蓮尋日亦炮轟葉建源無為業界爭取，喺TSA問題上只係「大力搞批鬥」，「喊口號就聲嘶力竭，講實幹就一事無成，光是曝光率多」。葉建源就反駁，話自己幾年嚟嘅工作情況教師們可客觀評論，自己喺政策上已盡力為教師爭取，好似TSA問題咁，唔單止做咗研究，亦見咗唔同意見代表，佢仲話仍有好多政策上嘅手尾要處理，估計無時間好似蔡咁搞大型記者會喎。