中環出更：議員官員廚藝炮製「蝦碌」
立法會議員同官員喺議事堂上雄辯滔滔、舌劍唇槍，但講到揸鑊鏟，好多時都係蝦碌連場。扶康會尋日舉辦年度烹飪比賽，邀請九名來自泛民同建制派嘅議員出席，參加「名人匯演」，但好多議員似乎煮嘢食都並非強項，大會就算畀晒貓紙，佢哋都錯漏百出，真係難為咗一班試食評判！
葉文娟卅年後再揸鑊鏟
由於議員梁美芬同蔣麗芸因事離開，現場就加入一個新「廚神」，就係主禮嘉賓社署署長葉文娟。佢坦言自從三十年前畢業入過廚房，曾經煮得唔錯，但之後就因公務繁忙冇時間煮嘢，擺明降低大家期望。
去到落手落腳嗰刻，各個議員官員「功架」就表露無遺。煮蝦仁炒蛋嘅立法會主席曾鈺成，話上年參加比賽時畀評判周中師傅皺眉，講笑就好似特首見泛民嘅表情咁。主持就笑議員劉慧卿（卿姐），上年食完佢嘅餸，事後瘦咗幾磅，卿姐反駁以為佢食過翻尋味添！
睇返製成品，似乎好多都係「極品」。身為醫生嘅議員梁家騮（怪醫）嘅蝦仁同蛋分開咗，畀評判笑做開國手，習慣用刀，將兩者切開咗；議員郭家麒啲蛋煮得太老；葉文娟就變咗蝦奄列；議員梁繼昌就係食刺身，即係未熟囉！煮牛肉嘅都唔好得去邊，議員梁耀忠擺明落咗好多糖，甜得滯。至於葉文娟雖然煮得唔太好食，但就同拍檔合拍，攞到合拍大獎，算係攞返個尾彩。
卓妮