牛頭角時昌迷你倉四級火慘劇，造成多名消防員死傷，引起社會關注迷你倉安全問題。發展局局長陳茂波尋日接受電台訪問時話，政府會盡快檢討迷你倉，未來不排除修例規管，又話研究喺舊式工業大廈安裝灑水系統。其實迷你倉嘅安全同防火問題早已經引起公眾疑慮，亦有立法會議員提出質詢，但政府一直無靈魂、無知無覺，依家出事就施施然話考慮修例加強規管，認真後知後覺，由研究到修例要一段時間，如果不幸再發生類似火災，唔知邊個擔當得起呢？陳茂波係咪一味顧住搵地起樓就乜都唔使理呢？
