政情：謝絕水泡 鍾國斌棄戰渡海泳
維港渡海泳十月舉行，每年都吸引唔少立法會議員報名參加，但往往報名後就陸續出現甩底情況，去年仲搞到無議員落水添！今年情況係咪一樣就未知，但起碼曾被冠為「立法會飛魚」嘅紡織及製衣界議員鍾國斌（Felix）就表明唔會參加，唔通怕不復當年勇而避戰？
其實Felix早兩年都已經無參加喇，而今年唔參加係因為大會怕有選手游游吓唔見人，強制要佩戴水泡，形容水泡「太肉酸」。雖然唔玩渡海泳，但佢就報咗另一個喺淺水灣嘅游泳比賽。
雖然水泡肉酸，但就無阻會計界議員梁繼昌（Kenneth）參加。Kenneth話，議員馬逢國已經代為報名參加優悠組，但佢坦言實包尾，因為對手太專業喎。另外，Kenneth亦都報埋Felix嗰個比賽，但只游二百米，話未熱身已經游完，果然有信心！而佢一星期都游到兩至三日水，莫非佢想同Felix爭奪「立法會飛魚」稱號？