政情：暑期工賣鑊 蕭嘉怡慘食白果
暑假就到，好多學生都會搵暑期工幫補收入，又可以累積工作經驗。中西區區議員蕭嘉怡（Kathy）讀書時每逢暑假都會搵工賺零用錢，做過嘅工種亦好廣泛，包括補習老師、畫班導師、美容院接待員等，而最難忘就係十八歲嗰陣走去賣鑊，點知一星期都賣唔出一隻，最後搞到要去執貨倉。
Kathy話，當年佢喺八蚊店做暑期工，期間被調派去賣鑊，可惜食白果，一星期都開唔到一張單，結果再被調派去執貨倉。當時正值炎夏，貨倉又密不透風，室溫高達三十幾度，仲要搬搬抬抬都咪話唔辛苦。不過，辛苦過後都有得着嘅，事關學識咗推銷技巧，以及點樣同唔同嘅人溝通，對佢依家做區議員好有幫助。
工作困身 難請助理
另外，Kathy過往因為請唔到助理，而要親自為辦公室落閘，仲搞到街坊誤以為執笠。佢透露，最近又有助理辭職，所以再次為請人而煩惱。至於點解流失率咁高？佢就話自己出手都唔低，但可能因為助理份工比較困身，唔係個個都頂得順喎。