尋日有幾位中學生以政壇新秀身份上電台節目，討論立法會議員地位係咪今非昔比，呢班學生都話議員地位大不如前，除咗歸咎拉布、流會等因素外，連飽受官司纏身嘅前特首曾蔭權爵士都被指係罪魁禍首之一！其中一位學生指出，回歸初期嘅法案通過率高達九成，但自從曾蔭權上位，成為首位用上「反對派」等負面字眼去形容泛民主派嘅特首後，就搞到行政立法關係步入僵局。
該名學生做足功課，話曾蔭權除咗用上「反對派」，更曾經發表「黑社會」論形容議員，認為係行政立法機關互不信任嘅表現，令矛盾日漸加深。
其實曾蔭權已經卸任四年，但佢嘅衰嘢連今時今日嘅中學生都依然熟讀，曾蔭權都咪話唔醜！有學生仲話，立法會平均年齡高達五十八歲，與年輕化嘅潮流背道而馳，加上議會近年混亂，拉布、佔領主席台等抗爭情況屢見不鮮，會令市民覺得立法會只係上演政治騷嘅地方，先會搞到議員地位下降，受到挑戰。
卓妮