中環出更:籌建新社企 助「文青」創業

香港青年聯會(青聯)早前舉行周年大會改選新班子,常務副主席吳傑莊(Johnny)將接替主席范駿華做新一屆主席,七月一日生效。Johnny未上任已滿腹大計,佢話打算籌辦一間社企幫助有心從事文化創意產業嘅青年創業,除咗提供平租嘅地方及生意機會之外,青聯嘅手足們亦會分享創業經驗,以免有心創業嘅港青行彎路。

Johnny話,現時有唔少資源幫助港青創業,但多數集中於科技行業,對文創產業嘅支援相對唔多。所以佢計劃提供便宜租金地方畀創業者,但目前仲搵緊合適地點,同時亦會出動青聯內嘅成功企業家們,為港青提供人際網絡及工作經驗等支援,希望在任期內做出成績。

同場仲有多位青聯前主席捧場,包括黃英豪、許華傑及葉振都等人。現時本港青年團體愈來愈多,在招收新會員及舉辦活動方面增加唔少競爭,許華傑認為青聯應該令定位更清晰,培養更多有實力嘅人加入政府諮詢架構。

蔡德昇密密操練防「發福」
和富社企會長李宗德女婿蔡德昇(Stanley)都有到場,卓妮見佢身形愈來愈Fit,唔知係咪秘密練功?Stanley笑認近期確係瘦咗好多,皆因被太太李美辰嘅說話刺激,令佢兩年前三十八歲時已意識到中年危機喎!話說兩年前影星張家輝嘅鋼條身形成為城中熱話,太太讚賞對方年逾四十仍有咁結實嘅身形,Stanley於是開始入健身室操練,每星期做足五日,佢笑稱依家略有成果,但唔可以公開示人喎!

卓妮

第一手消息請下載on.cc東網iPhone/iPad/Android/Windows Phone Apps