政情：周聯僑教仔理財要識盡責
咪以為工聯會副會長兼建造業總工會理事長周聯僑講嘢直腸直肚，就以為佢係粗人一個，其實佢對家人好上心，教仔女更加有一手。周聯僑透露，佢細仔曾經同幾個同學一齊誤中健身公司嘅不良營銷手法，簽咗三萬多元卡數，搞到要向佢求助。周聯僑當然上心，仲話以工會名義出面實拆得掂單嘢，但佢無咁做，寧願選擇幫細仔找數，要求細仔還錢同定期去健身，從而學識負責任。
雖然周聯僑背景係建制派，但原來佢細仔都有參與佔領行動，佢話明白後生仔有理想，但叫細仔要平衡理想同現實，滿口道理，唔知佢細仔受唔受呢套呢？
有鄉音因印尼出生
講講吓，其實周聯僑講嘢都帶有鄉音，但佢話其祖父同父親都係土生土長嘅香港人，講得一口純正廣東話。咁點解有鄉音？原來佢喺印尼出生，一歲時因為當地排華移遷福建定居，成廿二歲先返香港。不過，呢個經歷就令佢識講印尼話、福建話、潮州話等不同方言喇。