牛頭角迷你倉「長命火」超過兩日仲未救熄，成為近三十多年來燃燒時間最長嘅工廈火災，尋日再有消防員殉職，令人悲傷，而火勢一度由三樓蔓延至五樓，大廈外牆出現裂痕，睇怕醫番都嘥藥費。其實計功夫茶話齋，一場大火何止燒出大廈裂痕，消防官僚以至整個港府管治嘅裂痕，同樣暴露無遺吖！
第樣唔使講，淨係睇吓連日來班前線消防員大哥火氣十足，仲猛烈過現場火勢，就知咩料。有消防員狠批現場指揮錯判形勢，喺密封環境下使用鼓風機，結果導致一名高級消防隊長殉職，多名同袍受傷。事後流出錄音片段，有消防員狠批「肯定係佢（現場指揮）出錯，推啲兄弟出去死」，更有傳同袍間因情緒激動而有肢體碰撞添。話口未完，尋日再有消防員不幸犧牲，都咪話唔得人驚。
即係咁，到底現場指揮使唔使孭飛，仲要查過至知，但當局對工廈以及迷你倉消防安全零監管，就肯定珍珠都無咁真。查實舊年已有立法會議員提出有關質詢，點知港府連全港有幾多迷你倉都一頭霧水，更遑論訂立專門法例，旨意官僚把關，蚊都瞓蛇都死。
最離譜嘅係，當局懶理舊式工廈消防設施落後，竟然豁免樓齡超過三十年嘅工廈安裝自動灑水系統。係人都知，舊式工廈地方大，租金平，廣受市場歡迎，特別係嗰啲迷你倉，一層樓閒閒地開過百個倉，裏面存放大量易燃物品，加上每個倉獨立上鎖，出起事上嚟「火燒連環船」，唔爆大鑊至奇。當局大安旨意，坐視安全隱患，同推消防員去死冇乜分別嘅咋！
一葉落知天下秋，港產官僚出名四方木，唔踢唔郁，又點止消防處吖。好似前高官被指霸佔石澳官地、非法改建寮屋單嘢咁，原來地政總署舊年十月已經收到投訴並確認有寮屋進行擴建，居然藉口無迫切性而按兵不動，直至傳媒踢爆至急急補鑊，話不排除檢控喎，當中有冇人官官相衞，畫公仔唔使畫出腸喇啩。
講到官僚作風，當然唔可以漏咗海事處。該處有法不依，執法不嚴，最終釀成南丫海難慘劇，連申訴專員都忍唔住直斥「態度差劣」、「不作為情況令人難以想像」。海事處處長家陣先承認部門存在一些根深柢固、由來已久嘅陋習，遲唔遲啲吖。
根據管理學上嘅梅菲定律，凡係可以出錯嘅環節都會出錯，港府衙門大有大烏龍，小有小甩漏，正係典型例子。港府施政寸步難行，民望跌跌不休，民怨逼近爆煲臨界點，依家知點解喇！