政情：公民講場：李卓人倒米 復職令撤回

勞工及福利局局長張建宗尋日致函立法會內務委員會，就有關《僱傭（修訂）條例》草案，由於勞工顧問委員會對議員提出嘅修正案就金額方面未能達成共識，趕唔切喺今個立法會期前二讀，所以主動撤回草案。老實講，呢條有關復職令嘅草案係建議喺勞資審裁處可以就唔合理或唔合法嘅解僱個案，發出復職或再次聘用命令，如僱主唔遵守，需向僱員支付額外款項，政府建議賠償金額係五萬元，但工黨嘅李卓人提出嘅修正案就提高一倍至十萬元，李卓人應該早就預料到資方唔會首肯，依家政府撤回草案，等於一拍兩散，亦令到呢條拖拉咗超過十六年嘅復職令，又再落實無期，打工仔繼續做輸家，為乜呢？