政情：張國鈞爆律師迷信風水
律師嘅形象通常都係官仔骨骨、打官司孿都拗番直，有啲律師仲係好迷信添！本身係律師嘅中西區區議員張國鈞（Horace）就爆料，話律師係咁多行業中最迷信嘅一群，尤其係打刑事案嘅大狀就最講求風水。Horace會喺下月初出一本講法律界奇人奇事嘅書，書中亦會大談法律界迷信風水嘅軼事。
Horace話，大狀普遍都迷信風水，外籍律師比香港律師更甚。Horace自爆其律師行有次要搬辦公室，就試過喺中環睇咗成十間舖，但合夥人都唔啱心水，原因係合夥人聘請嘅風水師傅覺得唔好。至於佢依家嘅辦公室，合夥人都有唔少風水擺設。Horace話，佢唔係好信風水，但有人幫佢搞埋，都唔抗拒喎。
雖然Horace唔迷信風水，但就「迷信」日本劍道精神。佢話好欣賞劍道講求修養、堅持、尊師重道精神，所以一年多前開始習劍，仲不惜去日本花一百萬日圓（港幣七萬多元）度身訂造劍道服及護甲。