政情：葉建忠自詡落佔區激進
社工總工會早前換屆，由葉建忠接替張國柱（阿柱）任會長。相對阿柱，葉建忠嘅知名度就差咗一截，有人認為佢喺社福界行得比較後嘅位置，對比現時社工予人激進形象，似乎真係差咗一截。葉建忠就話，其實佢都可以行得好前，就好似前年嘅佔領行動，社總都曾經試過落去支援，佢都落過去旺角佔領區幾日喎。莫非佢認為咁樣就係行得前、算係激進？
葉建忠係宣教會學校服務隊助理督導主任，四年前起擔任社總外務副會長。佢承認自己一直都係企喺較後位置，好似影相時間，佢通常都係負責影嗰個，自然好少見到佢。不過，講到佔領行動，葉建忠就話社總會址喺旺角上海街，所以都有提供服務支援佔旺人士，尤其係爆衝突之時，而佢當時就曾經喺總部瞓咗幾晚「留守」。去到佔旺後期，葉建忠又要落佔領區負責「執仔」，即係搵有潛在輔導需要嘅年輕人，相信佢做開學校輔導背景，呢樣工作對佢嚟講就得心應手。