政情：卿姐參觀廁所 會影相表揚
立法會尋日開會討論《西九文化區管理局條例》的決議案，討論西九文化區內的管理細則。議員劉慧卿就話，香港係一個文明嘅地方，市民要有文明嘅行為，去到西九文化區要斯文、乾淨使用地方，咁就唔會同管理員有衝突喇。卿姐又特別關注廁所問題，話女廁最緊要多，仲話自己去新界習慣參觀廁所，見乾淨仲會影相留念，以示表揚。
卿姐尋日特別建議政府，喺西九文化區設立家庭廁所，畀照顧者同家人兩人入去，更加要有跨性別廁所，等跨性別可以安心使用。佢又觀察到女廁成日排長龍，建議西九文化區內廁所數目要足夠，咁嘅政府先算係「急市民所急」喎。卿姐仲話，每逢去新界嘅廁所，就會入去睇下，事關好多市民都投訴唔乾淨，佢見個廁所乾淨就會影相記低，希望政府可以喺廁所問題上做得更好喎。
講咗咁耐，卿姐話自己係支持決議案嘅，始終西九文化區係所有人引頸以盼，人人都想要。