政情：提11萬項修訂 怪醫圖拉倒醫委會改革

主席下周初決定會否剪布

現時醫委會廿八名委員中，十四名係由醫生選舉產生，十名醫生由醫管局、衞生署、中大、港大及醫學專科學院分別提名，並由政府委任，另外有四名業外人士由政府直接委任。草案就建議將業外人士增加至八名，但業界就批評未有同時增加醫生委員數目，擔心損害醫生嘅獨立性。而作為醫生嘅怪醫及直選議員郭家麒近期亦開始就草案暗中拉布，但一直未有明刀明槍。

立法會秘書處回覆查詢時指出，截至本周一，即就草案提出修正案作出預告限期前，秘書處接獲食物及衞生局局長高永文提出嘅五項修正案，而議員郭家麒亦提出三項修正案，怪醫就提交咗一封信，附有聲稱有逾十一萬項以電子檔案儲存嘅修正案，主席曾鈺成將於下周初會根據議事規則作出裁決，決定會唔會「剪布」。本報曾經向怪醫查詢，但佢未有回應。

法案委員會副主席陳恒鑌話，怪醫早喺法案委員會討論草案時，已經批評有議員要「趕收工」，希望有更多時間討論，又講過會提出修正案，但當時委員都表示唔會支持。他又話，怪醫曾經表達過，覺得今次醫委會改革，醫生自主程度會受影響，所以有憂慮，佢希望政府可以同梁家騮再討論一下，否則草案未能喺今屆會期通過，就要推倒重來。

張宇人狠批損害醫生形象

支持醫委會改革嘅飲食界議員張宇人就狠批怪醫玩殘秘書處同事，又叫怪醫唔好因為維護醫委會少數人嘅利益，而損害公眾對醫生嘅印象。有人分析，怪醫此舉不但未能收窄矛盾，更加令外界對醫生的印象變差，完全睇唔出對怪醫或對成件事有咩好處。不過，有名你叫「怪醫」，就係奇奇怪怪，真係估佢唔到。