中環出更：「御海‧南灣」改建公屋 大劉被追問 頭耷耷拒答
捲入澳門世紀巨貪案嘅華人置業旗下澳門樓盤「御海．南灣」，早前被澳門當局宣告收回土地，而澳門法院日前終宣布駁回有關上訴，有關土地更好大機會改為興建公屋。華置前主席劉鑾雄（大劉）尋日到灣仔富豪飯堂午膳，記得佢一年前喺飯堂外落樓梯失重心仆倒，多月來都步履蹣跚，要撐住拐杖行路，尋日由女友陳凱韻（甘比）攙扶，仲要搵人擔遮擋太陽。被問到上訴被駁回一事，大劉頭耷耷不發一言，似乎心事重重。
步伐蹣跚 臉容憔悴
尋日中午十二時，大劉三名「保鏢」已經喺富豪飯堂外守候，至接近中午一時，大劉先同甘比乘座駕抵達。當時甘比先落車，大劉就拎住拐杖尾隨，「保鏢」開遮為兩人擋太陽，由落車到飯堂門口只係幾步路，咁都要擔遮，似乎唔受得陽光咁喎。大劉看來清減不少，臉容憔悴，當被問到有關「非常上訴」同「御海．南灣」土地批給上訴被駁回一事時，大劉不發一言，喺甘比攙扶下，頭耷耷步入飯堂。
大劉同甘比喺飯堂逗留咗大約一個半小時先至離開。大劉一隻手捉實甘比前臂當扶手，另一隻手就撐住拐杖，慢慢行落樓梯，之後兩人就登上座駕離開喇。話時話，「御海．南灣」土地原本用作起豪宅，依家就好大可能變成公屋，見財化水，難怪無晒心情嘅。
卓妮