中環出更：郭位提倡科學煮義
煮餸都算係一門藝術，但係煮餸同科學又有咩關係？國際華商協進會（華商會）日前舉行慈善音樂會，慶祝創會三十周年，香港城市大學校長郭位、台北經濟文化辦事處處長嚴重光都去享受音樂盛宴，珠海學院校長張忠柟亦有份獻唱。郭位做核能研究就叻，唔知唱歌得唔得呢？佢笑笑口話唔識唱歌，但就鍾意下廚，仲話煮嘢同音樂一樣都係一種藝術，煮嘢更加係科學同藝術嘅結合喎！
郭位解釋話，同一道菜每個人煮嘅結果都唔同，例如番茄炒蛋至少有十種炒法，有人炒蛋先，有人炒番茄先，亦有人一齊落鑊炒，但係炒出來嘅味道都唔同！唔知郭位係咪做得多研究，連煮餸時都科學家上身呢？
羅台秦媽媽巧手豆渣變美食
推動善用廚餘嘅齊惜福主席梁祖彬都在場，事關今次慈善音樂會就係為佢哋籌募經費。講到惜食，華商會會長羅台秦話，媽媽一向都好注重環保，家中廚餘亦會妥善處理，好似打豆漿剩低嘅豆渣，加埋其他材料就可以變成另一味營養豐富美食。
今次音樂會幕後搞手係春風合唱團指揮兼華商會理事曹樹華，佢特別邀請好友兼世界級鋼琴家Pami Petteri Karvonen由芬蘭來港演出。除咗專業嘅演出者之外，中華廠商聯合會會長李秀恒及羅台秦等人亦粉墨登場，齊齊唱民歌串燒，為音樂會帶來高潮。
卓妮