其身正，不令而行；其身不正，雖令不從。港府之所以民望低殘，社會之所以七國咁亂，反對派興風作浪固然要負上責任，但根源係執政者其身不正，敷衍塞責，尤其係官官相護，互相包庇，有法不依，最令市民眼火爆。
嗱，好似最近嗰單霸佔官地醜聞吖，前高官及多名富商牽涉其中，公然喺大潭灣非法霸地僭建足足三十年。喂，小市民住劏房，細到轉唔到身，仲要付上堪比豪宅嘅租金，反觀達官貴人霸地僭建豪宅，仲要連花園、玻璃房及碼頭，竟然一毫子地租差餉都唔使畀，你話係咪離晒大譜吖？唔怪得醜聞一經踢爆就全城鬧爆喇。
之不過點離譜，都唔及地政總署離譜。署長承認，對霸地僭建呢單嘢一早知情，但就唔知點解冇人跟進，會徹查咁話，簡直當人白癡。解釋即係掩飾，有傳媒發現霸地者係主管房屋嘅前高官親友或同僚，畫公仔唔使畫出腸喇啩。「東方報業民意調查」顯示，絕大部分受訪者鬧爆當局長期縱容，隻眼開隻眼閉，係事件嘅罪魁禍首，呢啲咪叫公道自在人心囉。
上樑不正下樑歪，既然權貴非法僭建，港府有法不依，其他人點會唔有樣學樣吖。嗱，話口未完，連政府設施都被僭建攻陷，沙頭角一條地下排水渠長期遭人違規加高地台，鋪設電線連接附近嘅學校及農莊，渠務署居然話唔知情喎，你信唔信吖？
講起港府施政亂象，十日十夜都講唔完，點止懶理霸地僭建咁簡單吖。話說當局為咗幫日後實施垃圾徵費鋪路，將沿用多年嘅「大口仔」垃圾桶換成「細口仔」，以為咁就可以減廢，簡直太傻太天真。大家有眼睇，唔少人將一袋二袋垃圾丟喺旁邊就算，街道衞生仲衰過以前，簡直冇嗰樣整嗰樣。連督導委員會成員都冇面畀，直斥當局宣傳不足，又冇加強執法，卒之弄巧成拙。
仲有喎，雙非學童跨境上學問題拖咗N年都無人解決，深圳當局最近提議由港府斥資喺深圳買地興建港式學校應急，本來不失係權宜之計，點知港府狗咬呂洞賓，不識好人心，居然話暫時冇呢個打算。咁即係點？即係繼續坐視雙非學童日日返學好似長征咁囉，即係冷血無人性囉。正如受訪者話齋，雙非童問題係港府製造，家陣搞出大頭佛，不單止唔想辦法補鑊，反而推得就推，卸得就卸，教育亂象唔陸續有來至奇。
魯迅先生就講得啱嘞，裝睡嘅人係無法叫醒嘅。港府冇心冇肺冇神經冇靈魂，就好似一個裝睡嘅廢人，無論市民點怒斥點痛批，一樣無動於衷，詐聽唔到。咁搞法，香港有乜法子唔沉淪吖！