政情：民陣 泛民鬼打鬼 遊行鬥爭客
銅鑼灣書店五人失蹤事件喺書店店長林榮基返港大爆料之後，再度引起社會關注，對泛民主派來講，更加猶如久旱逢甘露，個個爭住舔。泛民各黨派更聯同互為表裏嘅支聯會，急急喺林榮基大爆料嘅「黃金七十二小時」內搞遊行，聲言要向強權說不。據了解，同泛民早已分家嘅民間人權陣線（民陣），其實已計劃將七．一遊行主題改為撐林榮基，但點解泛民仲要搶閘遊行？皆因大家互不信任、各懷鬼胎！
林榮基上周四夜晚喺民主黨立法會議員何俊仁（AV仁）陪同下爆料披露自己失蹤始末，仲指同樣失蹤嘅銅鑼灣書店股東李波唔係自願返回內地。點知李波就出來否認林榮基嘅講法，令成件事撲朔迷離。不過，縱使疑團未解，但泛民就急急聯同支聯會喺前日搞大遊行，原來係為咗飲頭啖湯，肥水不流別人田。
七．一遊行諗過轉主題
其實今次林榮基事件發生喺臨近七．一嘅敏感時刻，可以話係打一張靚牌畀泛民。本來已經公布咗今年七．一遊行主題為「決戰六八九」嘅民陣，喺上周五晚上亦再次開會，商討係咪要更改遊行主題為支持林榮基。據悉，會上有人提出係咪要更改主題，但亦有人擔心，泛民前日已經搞咗遊行撐林榮基，如果民陣到七．一再搞同樣主題嘅遊行，市民未必會再行第二次。
另一邊廂，泛民當中亦有人擔心臨急臨忙去搞遊行，人數可能未必好多，建議留待七．一民陣遊行先一次過發功。不過，基於泛民陣營一向各懷鬼胎，泛民同民陣又互不信任，有人就擔心如果等到七．一遊行先撐林榮基，到時就會歸功民陣，況且七．一遊行向來訴求多元化，加上事隔差唔多半個月，恐怕林榮基事件已經淡化。
民陣成員柯耀林話，民陣上周五晚上商討後，認為既然已公布遊行主題，所以決定維持原有主題，除非再有突變或民情升溫先再作考慮。至於係咪因為泛民已搶飲林榮基頭啖湯，擔心影響遊行人數而唔改主題，佢就話冇呢個諗法喎。究竟泛民係咪爭相「消費」林榮基，相信好似銅鑼灣書店五人失蹤事件一樣，真作假時假亦真。