中環出更：漢奸黎仇口多 霸王股民又踩場
過去連續多日都有唔同嘅團體及人士，踩到壹傳媒黎智英（漢奸黎）嘅大宅同壹傳媒大樓外抗議，而前日凌晨更有兩名男子乘坐中港車牌七人車抵達其宅，向其大宅連擲四玻璃樽施襲，都唔知係乜嘢人，為乜嘢事？而尋日逾廿名自稱係霸王國際集團股民再到漢奸黎大宅外抗議，轟「壹傳媒無良、還我血汗錢」。漢奸黎仇口多多，睇嚟踩場抗議嘅行動陸續有嚟。
高呼「無良壹傳媒 還我血汗錢」
《壹週刊》遭霸王國際集團控告誹謗並索償案，《壹週刊》上月被判敗訴。繼日前有自稱係霸王員工同關注組嘅人士，拉隊到壹傳媒大樓同漢奸黎大宅外抗議，尋日早上十一時左右，廿多名自稱係霸王國際集團股民嘅人士手持印有「無良壹傳媒，還我血汗錢」紅布白字橫額及字牌，到黎宅外抗議，期間多次高呼口號：「無良壹傳媒 虛假報道 股民慘！慘！慘！ 還我血汗錢」。
其中一名抗議人士伍先生指多年前購入及持有霸王股票，但壹傳媒虛假報道令股價大跌，即使依家《壹週刊》被判敗訴，霸王亦只獲賠償三百萬港元，股價及後再跌一成，令佢血本無歸。佢又不滿香港司法制度，認為制度理應制裁製造假新聞嘅不良傳媒，故相約一眾受事件影響嘅股民到場抗議，期望討回公道。抗議行動為時約一小時後，示威者和平散去。
卓妮