中環出更：教大「出生宴」 張仁良負傷撐場
香港教育學院正名大學波折重重，如今守得雲開成功正名為香港教育大學（教大），校方就舉辦一連串慶祝活動，前晚就搞咗個教大「出生日」慶祝晚宴，好多教育界人士聚首一堂，教大校長張仁良當然要「撐」場啦！佢真係撐(口架)，仲係撐住隻「痛腳」去添，認真有心。
還記得上月底慶祝教大成立嘅慶祝會，張仁良仲行得走得，但「出生日」晚宴上，就見佢撐住一對拐杖，左腳仲戴上疑似骨折使用嘅固定腳套添！聽聞好多在場嘅教育界人士都有慰問。點解突然傷成咁？卓妮打探過，原來佢上周喺校園跣親，左膝蓋骨裂，要一至兩個月復原，而校方回覆亦係咁講，仲話校長無請假，堅持返學添！
陳志輝滿場飛玩自拍
除咗張仁良之外，當然唔少得三名副校長呂大樂、李子健同黃敏兒，而校董會成員更加齊齊現身，唔少前教院校董亦有到場高興吓。好似現任中文大學市場學系教授兼逸夫書院院長陳志輝仲滿場飛，周圍捉住人Selfie（自拍），畀佢集郵嘅嘉賓多不勝數，包括擔任校董會司庫嘅會計師公會前主席趙麗娟、校董兼東華三院前主席陳文綺慧、家庭與學校合作事宜委員會主席湯修齊、公民教育委員會前主席李宗德等。
至於李宗德同教大有乜關係？原來佢成立嘅「和富慈善基金」去年曾經捐款畀教院成立「和富全人教育發展基金」，以推動教院展全人教育。在場仲見到教育局局長吳克儉同運輸及房屋局局長張炳良，雖則張炳良在任教院校長期間未能成功正名，但佢對教院正名嘅努力都係無可置疑嘅，最多只係虎頭蛇尾啫。
卓妮