政情：拒「印印腳」收租 李豐年落力搞辦館
連鎖超市當道，令到舊式士多辦館買少見少，香港昔日情懷幾成絕響。有「糧油王子」之稱嘅博愛醫院當年顧問李豐年（Kenneth），佢爸爸李廣林喺西營盤開糧油雜貨超市已經數十年，佢於外國讀完書即返港接手打理。Kenneth話，間超市街舖嘅市值租金遠比做超市賺嘅錢多，但佢唔想「印印腳」做收租佬，畀足心機經營之餘，仲致力保留間超市嘅舊式情懷，皆因香港傳統特色已經愈來愈少。
Kenneth講嘅舊式情懷喺超市內四處可見，包括幾乎已絕迹嘅海鷗牌洗髮膏、鐵桶裝但可散賣嘅雜餅乾，仲有食幾多秤幾多嘅各國香米，加上舊式嘅木板貨架等，令到店舖嘅懷舊風味十足而論貨品數量或面積，間舖都算有規模。Kenneth感慨話，外面超市上架費太貴，導致一些貨品逐漸被淘汰，所以佢刻意留一啲位畀呢類貨品。