中環出更：大堆頭健康操 破世界紀錄
俗語話「女人能撐半邊天」，但幾撐得都好，都要注重健康飲食同培養運動習慣。香港婦聯尋日號召七百多名婦女齊做「椅上健康操」，成功列入健力士世界紀錄。雖然活動以女性為主，但亦都邀請咗唔少男性擔任嘉賓，包括立法會議員梁志祥及田北辰（田二少）等。講起自己另一半，梁志祥竟然大彈老婆煮嘢唔啱食，反而田二少就話放咗工會返屋企陪老婆喎！
梁志祥話，近期老婆煮嘅嘢食唔多啱胃口，大呻無啖好食，佢自己就識煮兩味，最拿手係海鮮，仲話自己廚藝好過老婆喎。另外，卓妮見大會舉行鳴槍儀式時，梁志祥一早按實左耳，神情緊張。佢解釋話，兩年前游水時整穿耳膜，擔心鳴槍聲浪太大會再次傷及左耳耳膜，所以用手遮一遮。
議員練習 手腳生硬
至於田二少就自爆太太精神比較緊張，所以經常失眠。佢話，男人只要養到家，應付到經濟需要就得，但女人就要照顧成個家庭，例如老婆就擔心孫仔孫女讀邊間學校、仔女去旅行都要再三提醒佢哋小心等等，所以佢放咗工都會返屋企陪老婆，等佢放鬆吓心情。
同場仲有立法會議員葛珮帆及陳恒鑌、大律師容海恩、離島區議員周浩鼎等嘉賓，見佢哋在台下跟住大會練習椅上健康操，手腳生硬。其實今次活動就係鼓勵大家要平衡生活，注意健康，一班政界人士忙還忙，真係要抽時間做吓運動先得喇。
卓妮