「假作真時真亦假，無為有處有還無。」《紅樓夢》裏面嘅呢副對聯道盡無常世態。今時今日香港地，涉及南亞非洲兵團嘅罪案無日無之，同樣疑幻疑真，虛實莫辨，搞到市民日夜提心吊膽，人人自危，真係唔到你唔服。
呢，三名非洲尼日利亞裔男子日前「佔領」尖沙咀銀行理財中心多個小時，不斷撳錢，形迹可疑被捕，隨身嘅一百多張信用卡事後查明係堅嘅，係咪涉及犯罪仲有待進一步調查。話口未完，又有非洲漢身懷一百多張假信用卡撳錢斷正，除咗假卡之外，警方仲喺疑犯身上搜出讀卡器以及手提電腦等製假卡工具，好明顯，香港被金融犯罪集團睇中，已經淪為撳錢黨嘅樂園。
一時真卡，一時假卡，有時真係好難分辨，就正如街度兜口兜面唔係南亞人就係非洲人，邊個好人邊個壞人根本冇色認，市民惟有自求多福，小心為妙。好多的士大佬見南亞人士截車，都會「兜路走」或者「扮睇唔到」，唔係存心歧視，而係保命要緊。你知喇，南亞「劏的黨」近年橫行無忌，搭霸王車、搶錢、以假幣亂真、打人樣樣齊，都係敬而遠之穩陣啲。
話時話，假難民兵團姦淫擄掠、打家劫舍，無惡不作，已經搞到人心惶惶，成個社會永無寧日，家陣佢哋變本加厲，又成為國際撳錢黨嘅主力軍，實行暴力與商業犯罪兩邊通吃，市民真係有得震無得瞓。
蒼蠅不叮無縫的蛋，港府由旅遊天堂淪為犯罪樂園，唔係冇原因（口架）。試諗吓，港府對市民斤斤計較，鬼咁刻薄，對假難民不知幾慷慨，每年豪花巨額公帑照顧呢班友，包飲包食包回國免費機票不特止，仲派埋專人護送，簡直無微不至；司法機構亦係出名仁慈，假難民只要狀告港府「非人道對待」，分分鐘淨袋幾十萬衣錦還鄉；仲有嗰班假仁假義嘅政客，手指拗出唔拗入，懶理七百萬市民安危，反而為假難民「人權」奔走呼號，話反對「歧視」同傳媒「抹黑」喎。你話嘞，港府、政客同司法機構對假難民禮數咁周到，犯罪集團如果唔嚟香港食大茶飯，都對唔住主人家喇下話。
講到呢度，相信好多市民同功夫茶一樣，搞唔清楚到底港府係為港人服務吖，定抑或為假難民服務？舊年諾貝爾和平獎頒畀突尼斯嘅「國家四方對話平台」，表揚佢哋促成國內敵對派系和解，其實呢個獎港府一樣受之無愧，行政、立法、司法一向互相拆台，互相扯皮，家陣居然喺「保護假難民」嘅大旗下合作無間，都算「功德無量」咯！