政情：陳智思幫襯老店改褲
一套合身嘅西裝可以令人睇落醒神啲，早幾日我哋喺中環見到西裝骨骨嘅行政會議成員陳智思（Bernard），就咁揸住一條捲埋咗嘅西褲匆匆忙忙咁由ifc向環球大廈方向行去。佢上到商場二樓之後就一支箭入咗一間改衫舖，原來係想改褲，佢同店員打咗個招呼後唔夠兩秒就直接入更衣間拉埋個簾，應該係熟客仔。
隔咗一陣，Bernard就換咗之前手上條西褲出來，再由裁縫幫佢度身，唔通佢咁慳家改舊褲？Bernard之後就笑笑口話，其實條褲係新買嘅，佢係想改短條褲。佢仲話，呢間舖頭已經開咗有成廿幾年喇，佢都幫襯咗超過十年咁耐，皆因呢度價錢夠晒大眾化，師傅手工又好好，又近公司，所以邊有理由唔幫襯吖。當日見佢健步如飛，面色又好，Bernard歸功於每朝做一個鐘頭帶氧運動，仲話唔做會囉囉攣喎！