政情：醫委會改革 兩家鬥拉布
醫務委員會一直被指「醫醫相衞」，過分維護醫生利益，港府今年初終於吸納飲食界立法會議員張宇人改革醫委會嘅私人草案，提出《二○一六年醫生註冊（修訂）條例草案》（草案），包括將委員會內非業界嘅委員數目由四人倍增至八人。不過，醫委會改革好可能動搖到業界嘅專業地位，所以自從推出以來風波不絕，包括政府先後兩次「跪低」讓步、醫學界內訌，以至草案臨近埋尾，仍然遭到兩名本身係醫生嘅立法會議員「拉布」，拖延審議。
張宇人：「好日都唔出現」
草案委員會至今開咗九次會，原本預計今個星期一係最後一次會議，向內務委員會報告後就可以排隊上立法會大會。不過，本身係醫生嘅醫學界議員梁家騮同公民黨郭家麒，繼上月底喺會議上不斷重複發問，引來其他議員不滿之後，喺星期一會議再次重施故技，令到該委員會可能要再開多一次會，換言之草案提交上大會嘅時間會受到阻延。
據了解，張宇人喺會上曾批評有啲同事「好日都唔出現」，更點名指有份出席嘅郭家麒經常行出行入，即跟不上會議進度。亦有委員透露，梁家騮喺會上提出醫委會部分聆訊並非所有成員都可以出席，結果又掀起一番討論。值得注意嘅係，梁家騮提出嘅情況喺好耐以前已經出現，突然舊事重提難免令人覺得有心拉布，企圖阻止草案通過。
泛民建制罕有聯手力撐
草案除咗具爭議性，另一特別之處就係泛民主派同建制派罕有聯手推動草案。雖然早前曾經傳出泛民有意轉軚反對草案，但民主黨最近已表明會支持草案通過，而公民黨除咗郭家麒有待表態外，其他人亦傾向支持草案。相信喺民建聯、工聯會等建制派支持下，再加上部分泛民政黨支持，草案有望得到通過。至於加開會議一事，普遍議員都話無需要，因為好多問題已經問過，即使加開會議亦只係看郭、梁二人拉布，浪費時間。