中環出更：爭向劉華遞信 EQ輸畀葉劉
每逢官員出席活動，就係各大政黨爭相遞交請願信曝光嘅好時機。尋日端午節沙田舉行龍舟競渡，三個政黨為爭住向主禮嘅民政事務局局長劉江華（劉華）遞請願信，爭取喺大圍興建綜合市政大樓、善用橋底空間同空置校舍等。不過，作為劉華徒弟嘅民建聯（民記）立法會議員葛珮帆（EQ）就嚟遲一步。
話說新民黨同公民力量獲安排請願嘅位置較近場地門口，本來已經佔盡優勢，加上新民黨主席葉劉淑儀相當醒目，第一時間叫停劉華，成功搶先遞交請願信，至於民記副主席周浩鼎其後就出招，拉住劉華隻手唔放，更用咪表達訴求，成功延長劉華嘅逗留時間。
塞車遲到好激氣
不過，劉華接收請願信可謂駕輕就熟，約兩分鐘已經接完三封信，隨時比阿伯晨運嘅步速更快！劉華曾於民記同公民力量擔當要職，問佢今次再見兩黨嘅感覺，佢起初笑而不語，其後就話「認真聽取佢哋嘅意見」。
至於EQ就因為附近一帶塞車，遲咗兩分鐘無緣再遇師父，只差一點點先可以再會面，EQ直呼好激氣，呻話停唔到車。不過，EQ其後於場內睇比賽時，再遇上師父，師徒終於有緣重聚！
卓妮