中環出更：「比卡超」主人 愛駒絕不改名
早前任天堂宣布將港人熟悉的「寵物小精靈」的精靈角色「比卡超」改名做「皮卡丘」，引嚟唔少回響。卓妮尋日就喺快活谷馬場見到東華三院執行總監蘇祐安，見佢帶住個「比卡超」電話套，原來佢係參賽團體馬匹「比卡超」嘅馬主之一，呢日仲戴埋條「十萬伏特」閃電呔支持愛駒添，佢仲講明堅拒將愛駒改名。
蘇祐安話，最初佢哋幾個朋友都諗唔到愛駒叫咩名好，「比卡超」係大家嘅囡囡諗出嚟嘅，佢個囡都夠十八歲，所以有時都會代替佢入馬場幫手打氣。對於會否跟隨「比卡超」改名，蘇祐安就講明唔會，因為呢個名叫開，而且馬會批咗亦唔係隨便可以更改，會繼續沿用呢個名喎。
鄭錦鐘梘水糉照沾豉油
適逢尋日端午節公眾假期，好多名人都有入場，好似信興集團主席兼行政總裁蒙德揚、保良局前主席鄭錦鐘及立法會議員盧偉國。龍舟節梗要食番隻糉應吓節，鄭錦鐘就話佢今日試咗隻新嘢，就係「和牛糉」喇，將平日糉內嘅肥豬肉轉為和牛，同樣有油香，但無肥肉嘅膩。佢亦一向唔好甜，笑言早上太太開咗隻豆沙梘水糉，佢都要沾豉油嚟食，認真搞笑。
至於盧偉國就迷上上海嘉湖糉，糉內有大大塊金華火腿，咁識食皆因佢家中有食神，除咗父親當年係大廚，母親同細佬亦盡得父親真傳，好似用紅酒箱木板自製煙熏溏心三文魚，尋晚佢就喺家中炮製呢啲私房菜宴客喇。卓妮又見到蒙德揚，講起佢之前面色唔好，仲瘦咗廿幾磅，搞到個個以為佢有腸癌，但其實佢只係有腸臟遺傳病，目前好番而體重回復九成，難怪面色紅潤得多。
卓妮