年年「六四」年年爭拗，今年亦唔例外。悼唔悼念，點樣悼念，邊度悼念……拗到面紅面綠，其實計功夫茶話齋，好多嘢隨心嘅啫，正所謂牛唔飲水唔撳得牛頭低，何必將自己一套強加於人呢？
不過講就咁講，社會愈來愈撕裂對立，非黑即白，非友即敵，有啲人唔單止將信念強加於人，仲「強加於山」添，真係唔得佢死。尋日朝早之嘛，筆架山驚現一幅巨型白色直幡，上書「毋忘六四維園見」幾個大字，卒之要出動消防員游繩拆除。
真係諗極都唔明，香港係多元社會，大把途徑表達訴求，打上電台烽煙節目又得，喺臉書呃like又得，遊行示威都得，再唔係花錢喺報紙落廣告，起碼可以貢獻本土經濟，家陣未問准土地公就喺山頭亂掛標語，簡直「強姦山意」，離譜啲啩。
唔知係咪因為佔領之後無街可佔，於是有人諗起「佔領山頭」，自此之後郊野再無淨土，淪為各路政治人馬嘅表演場地，有人掛直幡，有人掛橫額，有人寫大字，有人畫圖畫，口號各適其適，搞到七國咁亂，唔知嘅仲以為返番文革遍地大字報嘅年代，唔怪得有人睇唔過眼，打出「山中無政治」口號反擊。至於獅子山，昔日係香港精神嘅象徵，家陣竟然變身政治行為藝術重災區，「獅頭」三日唔埋兩日就掛黃色直幡，有人形容上面把黃傘遠望埋去成道符咁，認真大吉利是！
即係咁，有啲人心口掛個勇字，係都要擒高擒低以身犯險，萬一有乜冬瓜豆腐衫長褲短，總算為理想「英勇犧牲」，求仁得仁，難為幫你執蘇州屎嗰班，出起事上嚟都唔知邊個負責。所以話，做人最緊要有手尾，自己直幡自己拆，自己塗鴉自己清，千祈咪累人累物累街坊吖。諗諗下，山中本是清淨地，無喇喇被政治化，一樣咁無辜嘅咋！
話時話，啲人成日嘲笑強國遊客周圍塗鴉「到此一遊」，丟人現眼，其實香港郊野烏煙瘴氣，都係五十步笑百步。最好笑係部分環保鬥士，開口埋口「保護生態」、「城鄉共存」，一聽到開發郊野公園土地建屋就大呼小叫，當正自己正義朋友上身。喂，依家有人公然破壞大自然，仲強姦埋山意喎，點解唔見佢哋出句聲？
蘇東坡就講得啱嘞，江上清風，山間明月，係「造物者之無盡藏也，而吾與子之所共適」。今時今日政治由街頭入侵校園，再由校園瀰漫至郊野，好好一筆公共財富慘被蹂躪，市民即使遁入山林都不得清淨，唔怪得人人爭住跳船搞移民喇！