社民連立法會議員梁國雄（長毛）向來鍾意喺會議上搞事、拉布、展示道具，又或者寸爆其他議員讀錯字等。不過，尋日輪到長毛自己出醜，除咗連續三次將前截取通訊及監察事務專員胡國興，讀錯成其死對頭工聯會議員王國興外，發言離題更被主席曾鈺成批評，搞到金融界議員吳亮星（星爺）都忍唔住笑佢，長毛於是老羞成怒，投訴星爺不特止，仲形容隔籬「狗吠」，跟住要求點算開會法定人數。
當大家以為點完人數應該會回復平靜，點知長毛再次發難，批評民建聯議員插嘴滋擾，又再投訴星爺喺會議上「搖頭擺腦」。
對於長毛嘅投訴，曾鈺成一於少理，反駁長毛「其他議員嘅行為比你平日嘅行為少得多」，仲叫長毛「唔好再節外生枝」。嗌完交，其後長毛又將胡國興講錯做王國興，仲要一連讀錯三次，佢就死撐話：「以下所稱王國興都均屬胡國興」，搞錯咁多次，睇嚟佢都唔應該再話人哋錯乜錯物喇！