中環出更：姚思榮啤一啤減10幾磅
啤酒被稱為「液體麵包」，飲得多容易有「啤酒肚」，但旅遊界立法會議員姚思榮就反而因為飲啤酒搞到激瘦十幾磅，唔通佢有獨門減肥秘方？姚思榮話，其實係因為佢有個「矜貴胃」，話說半年前同朋友去飲啤酒，當晚個胃已經唔舒服，翌日趕住遠行，就喺機場速食咗個漢堡包加汽水，跟住佢個胃就一直都唔舒服，搞到乜都唔食得，後來睇醫生先知係胃炎，好彩無咩大礙。
飲酒致胃炎 戒口半年
姚思榮話，因為胃炎呢半年來成日唔舒服，所以佢都要忍忍口，唔再亂咁食嘢，莫講話鮑參翅肚同肥膩嘢唔食得，就連食開嘅潮州粥都要戒埋。本身係潮州人嘅姚思榮話，以前佢爸爸每朝都會喺屋企煲潮州粥，日日都食完粥先返工。佢仲分享煲潮州粥嘅心得，潮州粥同廣東粥綿滑質感唔同，潮州粥煲完後啲米仍然係一粒粒，如果要煲得靚就要開蓋煲，煲到啲米「開花」就要熄火，然後蓋上煲蓋焗一陣，咁就可以食到水飯分離嘅潮州粥喇！
卓妮