中環出更：慈善鋼琴會 妙韻冇得彈 基層有得彈
為咗令弱勢社群有機會享受音樂，舉辦過街頭鋼琴活動嘅鋼琴家李明哲（Sheryl），日前夥拍另一鋼琴家區美玲及通利音樂基金會舉辦Duo Humoreske雙鋼琴音樂會，將收益捐畀音樂兒童基金會，為低收入家庭兒童提供免費樂器及音樂培訓。
原來區美玲童年時係Sheryl嫲嫲嘅鄰居，二人闊別多年後重逢兼受音樂兒童基金會理念感動，所以籌辦今次音樂會。當晚捧場名人眾多，包括香港大律師公會主席譚允芝及貿易發展局助理總裁黃靜文。黃靜文透露，與Sheryl及其好友溫蕙茵經常一齊打高爾夫球，係多年「波友」，所以每次對方有演出都一定會現身支持。
影相瘦面 譚允芝有計
不過，黃靜文就話無學過鋼琴，但學過結他，因為當年佢哥哥想學結他識女仔，所以就拉埋佢一齊去學，所以都識彈幾首好似《Today》等當年比較多人唱嘅英文歌。
原來譚允芝同Sheryl亦係相識多年，今次Sheryl演出前就連續兩個星期匿咗喺譚允芝屋企練琴，因為夠晒靜唔會有人騷擾。譚允芝同佢哋幾位老友合照時仲大教影相瘦面法，話影相時用脷尖掂住上顎，就可以令下巴嘅肌肉睇落收緊咗，塊面都尖啲，話係睇雜誌學番嚟，大家即刻忍唔住試吓。
出席捧場嘅仲有音樂兒童基金會董事戴麟，佢話香港好多小朋友百足咁多爪，但往往忘記享受其中，只顧考試，所以佢早前就同一班有心人開辦學校推動華德福（Waldorf）自然教學法，着重培訓及發展小朋友嘅社交及想像力。
卓妮