政情:收料站:版權法作罷 容偉雄照升官

政府尋日公布「政務官皇榜」,有十四名政務主任升職,當中最高級為商務及經濟發展局常任秘書長(工商及旅遊)容偉雄(Philip),雖然佢有份處理嘅版權修訂條例草案最後被迫「作罷」,但仍獲升正首長級第八級官員(D8)。其實大家都明嘅,佢原本負責開旅遊事務,半路中途先接手處理版權法,條草案最後衰咗,頭號元兇應該係佢上司商務及經濟發展局局長蘇錦樑同一眾反口覆舌嘅泛民議員,唔應該怪罪Philip。

今次獲升正D6嘅有三位,分別係駐京辦主任傅小慧、食物環境衞生署署長劉利群、以及康樂及文化事務署署長李美嫦。至於獲升正D4嘅就有四人,當中較出名嘅係民政事務局副秘書長羅志康,佢之前做過司長新聞秘書同海難調查委員會秘書,被視為官場明日之星。

官場「音樂椅」再現

官場近日同時傳嚟多個高層職位調動嘅消息,現任新聞處處長聶德權據悉會升任食物及衞生局常秘(衞生),接替即將退休嘅袁銘輝,新聞處長一職就盛傳由運輸署署長楊何蓓茵平調接任。至於喺早前嘅電視發牌風波中,表現仲勇猛過唔少局長同常秘嘅通訊事務總監利敏貞(Eliza),據聞亦有望升任常秘,一個說法係直接接替將於今年內退休嘅環境局常秘王倩儀,另一說法係由現任運輸及房屋局常秘(運輸)黎以德頂替王倩儀,Eliza再接番黎以德個位。

第一手消息請下載on.cc東網iPhone/iPad/Android/Windows Phone Apps