開講有話，三個和尚無水飲。咪睇港府部門名目繁多，人多勢眾，平時吹下水，以權謀私搵着數就叻，旨意佢哋做正經嘢盞嘥氣，萬一唔好彩爆大鑊，官老爺更加係你眼望我眼，想搵個人負責都難。
呢，城大冧天台事件震驚全港，暴露天台綠化監管漏洞多多，事發至今接近兩星期，莫講話冇人孭鑊，連邊個係工程「認可人士」都搞唔清楚。正如有業界人士話齋，綠化天台工程涉及市民安全，草被面積、用泥厚度以至樓齡等都會影響綠化天台嘅安全，如涉及改動樓宇結構，就一定要入則，絕對唔可以求求其其o架！
講就咁講咯，本港目前無法例專門規管綠化屋頂，亦無明文規定相關工程使唔使入則，港府淨係提供指引同建議，市民同業界根本無所適從，好似今次出事嘅城大綠化天台，興建前冇入則，結果幾乎搞出人命。正如「東方報業民意調查」顯示，大部分受訪者直指事件反映法例有灰色地帶，令人擔憂綠化屋頂存在安全隱患。
港府最鍾意趕時髦，潮流興環保，官老爺亦唔執輸，○七年斥資十億元推動屋頂綠化，可惜之後拍拍籮柚，闊佬懶理，屋宇署、發展局、環境局、教育局等各自為政，結果搞到七國咁亂，學校綠化天台冇入則亦未經教育局審批有之，爛尾收場有之，真係唔到你唔服。不過市民早就見怪不怪咯，大至取締僭建物，小至處理街邊晾衫問題，只要多過一個政府部門負責，官僚例牌鬥卸膊，唔出事至奇喇！
古語有云，弗備難，難必至，港產官僚拍拍腦袋決策，之後既無配套，亦無監管，唔少受訪者批評港府思慮不周釀惡果，變成好心做壞事，可謂一語中的。作家柏楊講過，外國嘅斑馬線讓行人安全過馬路，台灣嘅斑馬線就專門引誘行人畀車壓死。估唔到綠化天台喺外國係環保措施，嚟到香港竟然變成大殺傷力武器，情何以堪。
唔怕唔識貨，最怕貨比貨，綠化天台喺外國大行其道，用途廣泛，有人喺天台興建足球場，連國家隊集訓都靠晒佢。即使落後貧困如古巴，天台農場一樣搞得有聲有色，枉香港成日自詡國際都會，簡直笑大人個口！
城大冧天台事件責任誰屬，全城金睛火眼（目及）到實，校方委員會初步總結，話涉及排水設計、鋼架結構安全等十多個方面喎。其實仲使乜審吖，罪魁禍首咪就係港府無能囉。今日香港都市炸彈遍地開花，天台、招牌、樓宇、樹木……幾乎冧得嘅都會冧，市民一步一驚心，港府想唔認無能都唔得喇！