政情：公民講場：推銷海濱建設 波叔抽黎明水

早排歌星黎明喺中環海濱舉行演唱會，不論「核心內圍」即係有買飛嘅人，或者「核心外圍」都人頭湧湧，引起城中熱話。發展局局長陳茂波（波叔）尋日就喺網誌推銷灣仔北及北角海濱城市設計研究，竟然抽黎明水喎。波叔話有次經過黎明嘅演唱會，黎明嘅熱誠同負責任，令到演唱會變成「坎坷過後有艇搭」，亦令佢思考要盡量使用公共空間，例如喺演藝學院附近興建「日落廣場」、將前公眾貨物裝卸區設計成浮動泳池同埋日光浴區等等。但係呢啲建議一出就畀人鬧唔可行喇，點解波叔唔學吓黎明嘅誠意同負責任嘅態度去解決問題，而淨係識得抽水呢？