政情：今日你上鏡：「忙」命南丫島 周浩鼎食腸粉充飢

食一餐安樂茶飯，對所有人嚟講真係好重要，但離島區議員周浩鼎（Holden）尋日喺Facebook上載咗一幅食腸粉嘅照片，圖中嘅佢左手拎住膠袋，右手用竹籤拮腸粉食，非常狼狽。因乜嘢事Holden搞到要當街食嘢呢？Holden話尋日入咗南丫島處理居民寬頻安裝嘅問題，由於行程一個接一個，根本無時間去食午餐，惟有喺碼頭附近買腸粉充飢。佢話經常用腸粉當做午餐，事關好味又飽肚，又否認自己「堅離地」。