中環出更：避談塌頂家醜 郭位盛讚清華
好多人都會賣花讚花香，但香港城市大學校長郭位尋日出席香港清華同學會活動時，被問到有關城大屋頂倒塌，結構工程師拒絕出席會議嘅時候，就以自己冇第一手資料，同埋場合唔太適合等理由，避談城大，但係講起清華大學，佢就講得非常暢快喎。梗係喇！塌屋頂係醜事傳千里嘛！
郭位同兩岸清華大學都好有淵源，佢喺台灣國立清華大學畢業，話當年學校規模較細只有六百個學生，「所以有一個男生如果摸了女生的手，全校都知道，所以不能亂摸，所以我大學從來沒有摸女生的手」，讀到大學都冇諗要拍拖。直至一九八六年，佢喺美國當教授，到北京清華訪問，當時漆黑一片，沒有能源，校園裏樓上只有一點點燈光，原來啲學生跳緊社交舞，能夠省能源、交誼同運動，佢話：「我年紀那麼大，他們年輕人跳舞，我怎麼能跳啊！」
李慧琼難忘炒股「瘋」潮
佢又大讚清華比北京大學傑出，進入兩岸清華嘅都係一流人才，好嘅大學能把學位跟學識嘅距離縮短，而清華能將兩者距離縮得最細。
同場嘅立法會議員李慧琼就講到畢業嗰年係九六年，當時樓價都好高，而唔少同學畢業後，都會熱衷炒股，整體氣氛同依家好似，但當年氣氛就更恐怖，覺得市況係循環，可以升亦可以跌得好快。
卓妮