當年內地搞大躍進，話要超英趕美，點知眼高手低，短短幾年間經濟大崩潰，餓死民眾不計其數。今時今日嘅香港「教育大躍進」亦唔好得幾多，一味打腫塊面充闊佬，好大喜功，誤人子弟，搞到好多年輕人唔上唔落半天吊，認真慘情。
嗱，最新研究發現隨住專上教育近年不斷急速擴張，市民擁有專上學歷程度嘅比率由二○○一年嘅一成三急升至二○一一年嘅兩成三，十年間升幅近八成，睇嚟唔錯（口架）。可惜吖，讀得書多唔等於工作技能上升，更唔等於生活改善，有六成三專上非學位學歷人士嘅收入低於工資中位數一萬四千七百元，而三十至三十四歲人士中，持有專上非學位如副學士或高級文憑，月入三萬港元或以上嘅僅得六個百分點，遠遠低於持有學位者嘅四十二個百分點。
仲有，上述研究指出，專上非學位人士中有一成八至四成一人認為未來兩至三年嘅經濟、房屋及整體生活質素唔會得到改善，比率同高中學歷人士不相伯仲，你話係咪可悲吖？使咁多錢、用咁多時間修讀副學士，結果得物無所用，收入同普通一個中學生差唔多甚至更低，呢個唔止係學生個人嘅不幸，更加係教育制度嘅失敗。冇錯，喺港府好大喜功嘅教育政策下，副學士及高級文憑課程遍地開花，但有關課程泥沙俱下，質素參差，缺乏社會認受性，搞到好多學生高不成、低不就，畢業就失業，何止係誤人子弟，簡直係浪費青春，唔怪得畀人話係「掘頭進士」喇。
學毛伯伯話齋，實踐係檢驗真理嘅唯一標準。當年董建華政府為咗壓低失業率，不惜推出「多快好省」嘅副學士制度，仲話要將六成年輕人培養成大學生添，如此教育大躍進，早已被人批評係「教育八萬五」政策，今日終於證明鬧得佢啱喇。如果話副學士學生係「假上流、真基層」，咁唔使問阿貴，港產官僚就係「假有為、真無能」！
所以話啫，今時今日年輕人愈來愈激進，唔係冇原因（口架）。成個香港一潭死水，經濟一籌莫展，連被視為上流階梯嘅教育制度都一塌糊塗，咁仲有乜希望？尤其係基層學生，本來以為讀完副學士可以有出路，點知唔止前路茫茫，仲要孭起一身債，唔火滾就假。領導人訪港推銷「一帶一路」，以為咁就可以派經濟定心丸，穩住民心，社會和諧，真係一廂情願咯。
點講都好喇，副學士虛有其表，就係港府施政無能嘅寫照。年輕人如果想力爭上游，最緊要自己爭氣，呢個政府靠唔住o架！